October 29, 2022
Karen ramkulh, Kyarinnseikgyi peng, Kyaikdon ramri ralkap camp cu KNLA battalion-8 le Daw Na Column Division 1 phu komh nih zahan zaan suimilaam 9:30 ah an kah hna i hriamnam zong tampi an lak khawh tiah Daw Na Column- Southern War Zone nih a langhter.
An i kahnak minutes 10 a rauh hnu ah bomb, zenthong, meithal, meithal a tawi mi le kut cheh bomb pawl an laak khawh tiah a langhter.
Cu an i kahnak ah cun council ralhrang lei in minung pali an thi i minung paruk hma an pu. KNLA le rammi rungvengtu phu komh lei in hma pu le a thi mi an um lo tiah theih a si.
Atu tan an kah hnanak cu; KIO/ KIA ramri A Nangpa i a cang mi bantuk, ralhrang nih ningcang lo in an tuahser mi lehrulhnak a si tiah Daw Na Column-Southern War Zone nih a langhter.
Cu ti an langhter mi he pehtlai in RFA nih fehternak a ngeih lo bantuk in ralhrang lei zong nih thawng fianternak zei hmanh a tuah rih lo.
Ralhrang nih uknak a lak thawk in a luan cia September thla tiang thla 20 chung ah KNU kuttang Brigade 5 le 6 hmun ah kahdohnak voi 6689 a chuak cang i Council ralhraang camp 9 an lak khawh cang tiah KNU nih a langhter.
Hmanthlak ca – Kyaikdon ramri ralkap camp ah an lak mi hriamnam le KNLA le rammi ralkap phu komh ralkap pawl.
(Photo: Daw Na Column-Southern War Zone)
Ref. RFA Burmese
