Karen ramkulh, Myawady peng, Thingannyinaung hrambunh LIB-355 ah a ra mi SAC ralkap helicopter pakhat cu nihin January 29, zanlei sml. 2:30 hrawng ah KNLA hruai mi dohthlengtu ralkap hna nih tla lak in an kah tiah theih a si.
LIB-355 ah ralkap thlen ding in SAC helicopter pahnih an ra i KNLA le dohthlengtu ralkap nih an kah hna. Helicopter pahnih lakah pakhat cu a rawk i LIB-355 kulh chung ah a dir, pakhat cu a kir than, tiah ram chung media ngan hna nih an tial.
LIB-355 battalion ah a ra mi SAC helicopter pahnih cu KNLA/PDF phu komh Cobra Column nih missle, point 5 meithal le sniper meithal in an kah hna. Helicopter mawngtu pakhat an khen caah helicopter a tla tiah, Chaklei PDF hmunpi in tuanvo ngeitu nih Khit Thit Media ah a chim.
Kah a tong mi helicopter cu US Dollar nuai 9 deng man a si mi AS-365 Eurocopter a si i, aa cit mi Division-44 commander Brigadier Aye Min Naung tel in SAC lei panga hrawng an thi tiah Thlanglei PDF hmunpi nih a fehter.
Photo: KIC Via CJ
