Khualhring tlang mino bu (KMB) nih an ram chung ummi ngatainu tlang ah thingkung 1500 tluk an cin cang tiah theih a si.
Hi kong he pehtlai in Khualhring tlang mino bu president Van Lian Hum nih hitin The Hakha Post ah a chim.
“Ngatainu tlang ah thingkung cin hram kan rak thok hi kum 2018 in a si i, kum 3 tluk kan cin cang. Kum khat ah voi khat kan cin i, June thla hrawng ah cin hram kan thok theo,” tiah a chim.
Khualhring tlang mino bu nih Ngatainu tlang i an cin mi thingkung pawl kong ah “Kan cin mi thingkung pawl hi Cherry kung, Chokhlei kung, singpan le Zukalip kung ti bantuk pawl an si,” tiah The Hakha Post ah KMB hruaitu Van Lian Hum nih a chim.
KMB nihhin Ngatainu tlang ahhin kum khat ah thingkung 500 tluk hrawng an cin khawh tiah theih a si. An cin mi thingkung kong ah “Kan cin mi thingkung hi 500 tluk lengmang kum khat ah kan cin khawh. Nain kan hnu kum hrawng kha cu satil nih a kan nanpiak pah i, a thi mi tete an um len. Nain kan ruahdamhnak ahhin a nung mi hi kung 400 tluk cu an si lai. Tuhi tai tluk zong an um len cang hna i, kan tha a nuam ngaingai ko,” tiah The Hakha Post ah a chim.
“Ramleng ummi le Yangon um ti bantuk pawl nih an kan dirpi i bawmhnak tete zong an kan tuah caah tuhi thirhri-hling in kan kulh cuahmah lio a si. Kan kulh dih khawh cun satil zong nih a kan nanpiak kho tuk ti lai lo caah kan cin mi hi tam deuh ngai cu an nung kho cang lai tiah kan ruah. Cun kan cinmi thingkung kong ahhin Hluttaw palai Van Thawng nih a kan halpiak mi an si. Cun amah Hluttaw palai Pu Van Thawng hrim zong nih bawmhnak tete zong a kan tuah theo,” tiah The Hakha Post ah KMB mino hruaitu Van Lian Hum nih a chim- chap.
KMB hruainak in an ram chung ah uifim in ramvah le tiva ah bomb puah, parathlei, lengkhang zam, le dynamo in nga tlaih ti bantuk hna zong an khap chih tiah theih a si.
