Kachin ramkulh, Winemaw peng ah a um mi SAC ralkap sakhaan pahnih cu nihin March 8 chunhnu sml. 1:00 hrawng ah KIA nih tlamtling te in an laak khawh chap, tiah theih a si.
Aung May (A) khua ah a um mi Inlungkha SAC ralkap le Pyiuthsit sakhaan cu nihin zinglei ah KIA nih Drone in bomb an thlak hmasa i chun hrawng ah an luh hnawh.
“Chun sml. 1:00 hrawng ah khan Pyituhsit Sakhaan cu tlamtling te in an laak. Cuka ah cun kum 60 leng a si mi pyituhsit putar pakhat telh in pyituhsit pahnih an nung in an tlaih hna. Cun, sml. 2:00 hrawng ah an sakhaan cu mei in an khanghpiak hna,” tiah Aung May (A) khua upa pakhat nih The 74 Media ah a chim.
Kan Daw Yan khua pawng ah a um mi Malikhan SAC ralkap sakhaan zong KIA nih nihin ah an laak fawn.
“Nihin ah Aung May (A) khua i SAC ralkap sakhaan le Kan Daw Yan khua pawng i Malikhan SAC ralkap sakhaan pahnih hi KIA nih an laak hna. Nizaan ah khan SAC nih vanlawng in a rak kah tuk hna caah an la manh lo i, nihin ah a pahnih ning in an laak hi a si,” tiah khua upa nih cun a chim.
March 7 thawk in Kachin ramkulh, Winemaw peng, Moemauk peng le Hpakan peng chung i SAC ralkap sakhaan tampi cu KIA nih voi khat te ah kahdoh hram a thawk i, nihin March 8 tiang ah SAC ralkap sakhaan 12 hrawng an laak khawh cang, tiah theih a si.
