Kachin ramkulh, Myitkyina peng, Ayeyarwaddy tiva kam ah a um mi Sinbo khua Palek Sakhan cu KIA nih an laak i a khuapi ning in KIA kut ah a um cang tiah Kachin tualchung media hna nih an tial.
Sinbo khuapi laak kahdohnak cu February 10, zinglei suimilaam 7:00 fai ah KIA le PDF nih an thawk tiah theih a si.
“A ni khatnak ah Sinbo khua ah a um mi palek sakhan pawl an laak hna i, cu hnu ah ralkap camp pawl an kah lio. Khuachung cu KIA le PDF kut cung ah a um cang i, khua leng ah a um mi LIB-141 an kah cuahmah,” tiah KIA chimphuannak nawl ngeitu Colonel Naw Bu nih tualchung media a chimh hna.
Sinbo palek sakhan ah SAC palek le ralkap cawhhrup in an rak um nain atu ahcun khua he meng thum a hla mi LIB-141 SAC ralkap battalion ah an i fon cang. PDF le KIA nih an kulh hna i kahdohnak ah SAC nih vanlawng in bomb a thlak hna tiah theih a si.
LIB-141 ralkap camp cu kum 20 hrawng a um cang mi camp ngan pakhat a si i, cu camp ah cun SAC ralkap 200 hrawng an um tiah tualchung media KNG nih an langhter.
Ayeyarwaddy tiva kam ah a um mi Sinbo khua cu Myitkyina peng chung ah a um mi khuapi thar a si. 2002 kum ah khuapi sinak an rak pek mi a si i, inn 1,000 leng khua an sa tiah theih a si.
