Kachin ramkulh, Momauk khua cu nihin August 19 zaanlei sml. 3:00 hrawng ah KIA nih a laak khawh cang, tiah theih a si.
SAC ralkap thazaang 500 hrawng an umnak Momauk khua pawngte i Kha Ma Ya (437) SAC ralkap sakhaanpi cu KIA nih July 24 thawk khan doh hram a rak thawk i thla khat dengmang a ruah hnu nihin August 19 ah a laak khawh hi a si.
“Nihin zaanlei sml. 3:00 hrawng ah khan Kha Ma Ya (437) SAC ralkap sakhaan chung cu thianhhliamhnak an tuah dih cang. SAC ralkap pawl cu aa ṭhenṭhek in an zaam dih hna,” tiah KIA ralkap pakhat nih 74Media ah a chim.
Momauk khua pawng Bamaw khua lei in bawmh awkah a rak rami SAC ralkap pawl zong lampi ah KIA nih an kah hna caah SAC ralkap mawtaw pali le Tank pakhat an kaang i Momauk khua ah bawmtu SAC ralkap an phan kho ti lo.
Momauk peng chung ah a donghnak bik a taangmi Kha Ma Ya (437) SAC ralkap sakhaanpi cu KIA nih a laak khawh cang caah Momauk khua lawng si loin Momauk peng chung dihlak ah SAC ralkap an thiang cang, tiah Kachin tualchung thawngzamhnak hna nih an ṭial.
