Hakha Khuathar sang ah minung 5 nak tam i pumh khawmh lo ding in SAC ralkap nih nawl a rak chuah mi cu June 23 thawk in a dihter cang, tiah theih a si.
Kan hnu April 12 ah Khuathar sang lamtonnak ah SAC vuanci pawl motor phu cu CDF-Hakha nih an rak kah caah Khuathar sang chung ah a um mi dawr vialte khar dih ding in le biakinn ah minung panga nak tam i pumh lo ding in April 22 ah SAC nih nawl a rak chuah.
Minung 5 cung i pumh lo ding le ahohmanh dawr hon lo ding in SAC nih nawl a chuah ruang ah thla hnih chung biakinn ah pumh khawh lo in an rak um.
Minung 5 cung pumh khawmh khawh lo nak nawl cu June 23 ah SAC nih a donghter cang nain dawr belte cu honnak nawl an pe rih hna lo.
Tualchungmi pakhat nih, “Atu cu biakinn ah kan i pum kho cang. Asinain, dawr pawl tu cu an honter rih hna lo,” tiah a chim.
Hakha Khuathar sang dawr pawl cu a ra lai mi August 20 tiang khar dih rih ding in SAC nih nawl an pek hna, tiah theih a si.
