Khuasik ah hin zawtnak tha lo, tlangrai hi a zual tawn ca ah, COVID-19 zawtnak zong hi a zual kho mi a si, tiah Yangon Laboratory Zung (atu lio COVID-19 zawtnak a chektu) Deputy Director Dr. Myat Htut Nyunt nih a chim.
“Zawtnak thlalo pawl hi khua a sihnak le a kih caan ahcun, a zual deuh tawn. Hi COVID-19 zawtnak zong hi a hramthok ahcun, a kihnak hmun lawng ah a um kho rua. A linhnak hmun ah a um kho rua lo tiah kan rak ruah. Asinain, atu cu a linhnak hmun zong ah a karh thiamthiam. Cucaah, i fian a har ngaingai mi zawtnak a si. Mah bantuk zawtnak (virus) pawl hi, a linhnak hmun ahcun caan a sau a nung kho tawn lo. A kiknak hmun ah hin caan sau a nung kho deuh. Cun, a kihnak hmun ahcun zawtnak I chawnh zong a rang deuh ve. Asinain, atu tiang ah COVID-19 zawtnak umtu ning hi WHO zong nih a dihlak in an theithiam ve lo nain a kihnak ahcun zual deuh khawh a si ko,” tiah The Hakha Post ah a chim.
“Cun, hi bantuk zawtnak pawl hi, rianrang taktak in a karh tawn i, a sang bik level a phak in, a tla than tawn. Atu Myanmar ramchung a karh ning hi a sang bik level kan phak le phak lo chim khawh a si rih lo. A ruang cu a kar lei hi kan phanh rih ko ca ah a si. Hi hnu zarh 2 hrawng kan hngah lai i, aa fiang te lai tiah kan zumh. Cun, atu COVID-19 zawtnak hi D in G ah aa thleng mi a si. Zawtnak i chawnh cu a rang deuh nain a thazaang hi a der deuh ve,” tiah a chimchap.
2020 September 4 zinglei suimilaam 9:00 tiang ah Myanmar ramchung ah COVID-19 zawtnak a ngei mi minung 1133 an si cang. Zawtnak in minung 359 an dam than i, minung 356 sii-inn in an chuak cang. Minung 7 zawtnak in an thi, tiah Ngandamnak Zung nih a thanh.
