Chin Ramkulh, Falam Pengkomh, Waibula khuapi, Waibula in Kalay lei kalnak Waibula tlang ah company pakhat nih khuami hna theihternak pakhat hmanh tuah loin leitang chuak thil mansung an cawh tiah Waibula Ukchukzihmu sin in thawng kan theih.
Waibula tlang hi Chin Ramkulh le Sagain ramthen i ramri ah a ummi a si i, Company lei rian ngeitu hna nih lam an chunh, pawngkam ah inn zong zei mawzat an sak ca ah Sagain ramthen lei i khuami cheukhat hna an lung a tling lo ca ah khuami cheukhat le Kalay myo ukchukzihmu hna nih an va zoh tiah kan theih.
Waibula Ukchukzihmu nih, “Rian an thoknak hi zarh khat hrawng a si cang. Kanmah sin ah zeihmanh theihter nak an tuah mi a um lo. Kalay pawngkam khua mi zei mawzat ka sin ah an rak ra i an rak ka chimh. Hi hnu lawng ah keimah zong ka theih mi a si. Cozah lei zong nih zeihmanh thawng an kan thanh lo. Asinain anmah company lei tu nih cun Cozah hnatlak pinak le nawl peknak in kan tuan mi a si,” tiah The Hakha Post ah a chim.
Hi rian a tuantu Company hi Phoe La Min Ta Ta 2 Co.,Ltd an si i, leitang chuak thil mansung an cawh tak ko a si cun pawngkamh khuami hna ca ah sunghzatlak nih a ton ding hna dirhmun a si. Hi bantuk tiang a si ca ah Kalay Peng lei in khuate komh 3 Ngapha khuate komh, Natchawng khuate komh, Htauk Kyant khuatekomh hna nih lungtlin lonak an langhter cang.
Hi kong he pehtlai in Chin Ramkulh Agriculture, Livestock and Forest Minister Pu Mang Hen Dal nih, “Chin Ramkulh Cozah lei nih tuan uh, tuah uh tiah nawl kan pek mi a um hrimhrim lo. Cun, Chin Ramkulh chung ah leitang chuak thil mansung hi nikhat tuan nikhat ei lawng in tuan nak nawl pek khawh a si i atu bantuk in tuan aa timmi hi cu Pyadawngsu Cozah lei he aa pehtlai mi a si. Hi kong ahhin Chin Ramkulh Cozah nih nawl kan pe hna lo. Chin Ramkulh nih nawl pek in kan tuan mi a si an ti a si cun a herh mi ca pawl kha hal hna ulaw ka zoh lai. A deu a si cun upadi ning in kan kalter ve lai,” tiah The Hakha Post ah a chim.
Waibula tlang hi Waibula khuapi in thlanglei ah a um i meng 15 hrawng aa hlat. Chin Ramkulh chung ah leitang chuak thil mansung hi Tedim peng, Tonzang Peng ah a tam cem a chuahnak hmun a si i, a pahnihnak ah Falam Peng hi a si ve tiah kan theih.
Photo/ Kyaw Tet Win
