Sagain ramthen, Tamu Peng Khampat khuapi, No.1 sang ah khua a sa mi nu pahnih hna cu June 15 ahkhan a ho ti hngalh lomi pa pahnih nih meithal in an kah hna i fak ngai in hliam an tuar tiah thawng theih a si.
Khampat khuasa Chin pa pakhat nih, “Motorcycle in pa pahnih an i phur i U Hte Aung inn hmai an phak ah meithal in an inn lei cu an hmuahthimh. Meithal cu an hmeh i innleng an donh mi cung ah a thu mi U Hte Aung a nupi Pi Cing Lawh Nuam (kum 40) le an inn ah a leng mi Mai Vum Ngin Cing (kum 23) hna cu meithal kahnak ruang ah hliam an tuar. Pi Cing Lawh Nuam hi a kutdong a parh, cun Mai Vum Ngin Cing hi a kutdong pahnih a parh ve. Atu bantuk in hliam an tuar ca ah sii-inn ah chiah an si,” tiah The Hakha Post ah a chim.
Meithal kap tu pa pahnih hi nihin tiang ah a ho an si ti an hngal rih lo. Palek nih hlathlainak an tuah lio a si tiah kan theih.
Meithal hmangtu pa pahnih hna kong he pehtlai in Khampat Ukchukzihmi U Kyaw Sua Min nih, “Meithal a kaptu pa pahnih hi kan tlaih khawh rih hna lo ca ah fiang tein kan chim kho rih lo. Inn a ngeitu pa hi sang ralkap hruaitu pakhat a si. Rithai sii lei dohdalnak ah biatak tein a cawlcang mi a si. Keimah nih ka ruahnak ah cun hi kong pawl he aa pehtlai mi a si theu lai tiah ka ruah,” tiah The Hakha Post ah a chim.
Photo/Internet
