Rammi rungvengtu ralkap phu komh nih an laak mi Khampat khua laak than awk ah raal hmainor in a rak namtu SAC ralkap pawl an zaam tiah NUG, Runvennak Minister Zung (MOD) nih nihin, December 16 ah a thanh.
Sagaing ramthen, Khampat khua a rak namtu SAC ralhraang 200 hrawng cu No. 1 Regional Command hruainak in Sagaing ramthen chung PDF special battalion, pengkomh battalion, LPDF le dohthlengtu ralkap phu nih an doh hna caah tu zing ah an zaam than tiah MOD nih cun a langhter.
Kahdohnak chung ah rammi ralkap phu komh nih MA-10 RPG 7 zun khat, MG-3 zun khat, MA-S1 MK2 zun khat tel in hriamnam zun 17 an laak khawh tiah theih a si.
Atu ah cun khua a velchum ah runvennak an tuah cuahmah i, a tlawm bik ah ralbawi pakhat tel in SAC ralkap ruak 10 leng an hmuh cang ti zong an tial.
Khampat khua laak than ding ah SAC nih December 15 thawk in an hung nam hna caah khuami dihlak le pawngkam khua nga nak tlawm lo cu khua chuah taak in an zaam tiah kan theih.
Photo: MOD
