Hakha Timit cung Keivaangzuan lunglaknak tlang cimh aa tim mi cu Chin cozah Lamsullei Zung nih bomb kan puah lai i kan chimh lawlaw lai tiah Chin ramkulh cozah Lamsullei Minister sin in thawng kan theih.
Hi kong he pehtlai in Lamsullei Minister Pu Sui Thio nih “Bomb kan puah lai i a cim ding mi khi kan chimh lawlaw lai. Cuti cun tih a nung mi khi thlak lawlaw kan timh. Amah belte cu cuti kan tuah ding ahcun a zarh ning tibantuk in lam kan phih chung a hau. Cu hmanh ah cun Zarhpini mi kin ni ah kan tuah lai. Theng ngei vialte bawmh kan hal hna lai i rianrang tein siam colh khawh ding in kan zuam lai,” tiah Minister Pu Sui Thio nih The Hakha Post ah a chim.
Bomb puah ning ding kong he pehtlai in “Bomb hi zeitluk tha a thawng mi dah kan puah lai ti tu cu tuanvo ngeitu nih an tuak te lai. Zeitik ah kan puah lai ti zong lamsullei Chief Egineer khual a tlawng i a fiang deuh rih lo. Tuzarh Zarhpini hi cu kan puah kho rih lai lo, hmaizarh lei ah a si te lai, a karlak tu cu theng in chun he zaan he kan hngah ko,” tiah Minister Pu Sui Thio nih a chimchap.
A hrialnak lam kong he pehtlai in “Lam thing lei in a hrialnak lam remh ding hi cu a fawi lo, cucaah atu i cimh aa tim i tih a nung mi tu khi rianrang tein fimtawl khawh tu kan i zuam lai,” tiah Minister Pu Sui Thio nih a chimchap.
“Atu dirhmun khi cu cimh aa thawk cang si kaw, zeitik ah a cimh than lai le zeican a rauh lai chim khawh a si lo ca ah cubantuk dirhmun a si mi lam zapi nih nifatin zulh khi cu minung nunnak ca ah tihnung tuk a si ca ah a hrialnak lam cu lamsullei tuanvo ngeitu nih a rannak in an tuah hrimhrim a hau. Tangka a dih tuk lai ti le a har tuk ti ding a si lo. Zeicatiah minung nunnak cu zei hmanh nih a rul kho lo. Nifatin zeimawzat in a cimh peng cang tik le umkal lo awk a that lo tik ah harnak kan tong lai lo ti khawh a si lo,” tiah Timit ah nifatin Hakhathar ca ah Kambawza nih bawmh mi meithahnak motor in ti a than mi Thawng Pi The Hakha Post ah a chim.
Hi lunglaknak a cimh ding mi le a cimh sual ahcun tih a nunak kong hi The Hakha Post nih April 5 ah a hmun ah va kal in hlaithlainak an va tuah i, Chin cozah nih ralrinnak le tuan tein a hrialnak lam hleng tuah a hauhnak kong an rak thanh cang. Asinain nihin tiang a hrialnak lam tuah a si lo ca ah a cim pah lengmang nain zapi nih tihphang bu in zulh cuahmah a si.###
