Sagaing ramthen, Kawlin khuapi laak kahdohnak ah SAC ralhraang 50 hrawng an thi, 21 nih hriamnam an chiah i mizapi ralkap lei in pathum nih nunnak an pek tiah No. 1 PDF hmunpi nih a thanh.
Kawlin khua cu November 3 zinglei suimilaam 4:00 hrawng in November 5 zanlei 7:00 tiang an tuk hnu ah an laak khawh. SAC hriamnam a phunphun zun 69, jammer 4, zenthong le bomb phun tling tampi le a dang raal thilri tampi an laak khawh tiah kan theih.
Kawlin khua chung ah SAC ralhraang battalion LIB – 369 in Lt. Col. Thet Paing Myint hruai mi ralkap 57 cu tang hra sianginn ah; Lt. Col. Thein Zaw Lin hruai mi LIB-111 le LIB-120 in ralkap 40 hrawng cu Uknak Zung ah; Peng Palek Zung Lutlai captain Than Lwin hruai mi palek 66 cu palek sakhan, Shwe Nwe Phyo lakphak dawr le tlanglawng station ah ti in hmun an khuar tiah theih a si.
Cu kahdohnak cu NUG Runvennak Minister Zung, No. 1 PDF hmunpi kut tang ah a um mi Kawlin pengkomh thithruainak zung, Kawlin pengkomh B-1, B-2, Sagaing ramthen PDF, Kawlin pengkomh/peng PDF le Federal Wings i bawm in tuah mi a si. Raal lei bawmtu an rat khawh lo nakding khamtu ah Kawlin pengkomh B-3, B-4 le Wantho peng PDF nih tuanvo an laak tiah an langhter.
Khuapi laak kahdohnak ni thum chung ah SAC nih raltuknak vanlawng le Mi-35 helicopter in voi 49 kahdohnak a tuah tiah No. 1 PDF hmunpi nih a thanh.
Photo: No. 1 PDF Hmunpi
