Pengkomh khuapi a si mi Kawlin khua cu kan laak i hriamnam kuanzen tampi kan laak khawh tiah NUG, Runvennak Minister Zung, PDF Hmunpi nih nihin ah a thanh.
“Kawlin khua chung ah raal pawl nih hmun an khuarnak Kawlin Palek Sakhan, Uknak Zung, Taanghra Sianginn, Vawlei Tahnak Zung le MEB Bank kan laak khawh hnu ah, kan raal pawl ukhruainak a dir mi Kawlin khuapi cu tlamtling tein kan laak khawh. Pengkomh dot a si mi khuapi a voi khatnak kan laak khawhmi a si,” tiah an langhter.
Nizan November 5 zanlei tiang ah hriamnam phun tling zun 54 an laak khawh i kahdohnak he pehtlai in a rauh hlan ah thawng fiang deuh in kan hun thanh than lai tiah theihternak an tial.
No. 1 Military Zone, Kawlin pengkomh thithruainak in PDF le hawikom phu hna nih Kawlin khuapi cu November 3 zinglei ah tuk hram an thawk i a ni linak November 6 ah khuapi ning in an laak khawh hi a si.
Kawlin khua cu Sagaing ramthen chung ah a um i Kawlin pengkomh ah hin peng pathum an um. Cuhna cu; Pinlebu peng, Wuntho peng le Kawlin peng hna an si. Kawlin khua cu minung thongkul le thongnga hrawng khua an saknak khuapi a si tiah kan theih.
Kawlin khua cu Sagaing ramthen chung ah rammi ralkap nih an laak hmasa bik mi khuapi a si tiah kan theih.
Photo: NUG-MOD (SAC ralhraang hna sin in laak mi hriamnam le kuanzen an si.)
