July thla, Karenni (Kayah) ramkulh chung kahdohnak ah SAC ralkap 84 an thi, a nung in 3 tlaih an si i, meithal zun riat tel in hriamnam tampi kan laak tiah KNDF nih nihin ah an thanh.
July zarh thumnak ah Shan ramkulh Thlanglei Pinlaung peng in Pekon peng an tan i Loikaw peng ah a lutmi SAC ralkap thilri chaantu motor tlar cu Loikaw pawng ah Karenni ralkap phu komh nih an kah hna; Motor 3 an rawk i SAC ralkap 20 nak tlawm lo an thi.
July thla khat chungah Karenni ramkulh chung KNDF phu komh he kahdohnak voi 33 a chuak. Cu kahdohnak ah cun SAC ralkap 84 an thi, a nung in 3 an tlaih hna i meithal zun riat tel in hriamnam tampi an laak. Cu kahdohnak pawl ah KNDF lei in ralkap 2 nih miphun le ram caah an nunnak an pek.
July thla chung ah SAC ralkap nih vanlawng in kahdohnak voi 42 a tuah i, ngakchia kum 11 mi tel in rammi 4 an nunnak a liam, minung 8 hliam an tuar. Hriamngan ruangah rammi pakhat a thi i 14 hliam an tuar.
SAC ralkap nih sualnak ngei lo khuami 7 an thah hna. SAC ralkap nih vanlawng in an kahnak ruangah inn 13 a rawk, Biaknak inn 2, sianginn 2 zong an rawk. Khuami minung 300 hrawng cu ralphaw ah an hman hna tiah theih a si.
