Karen ramkulh Demawso peng, Dawnye-hku khuate pawng ah a um mi SAC ralkap pawl cu Karenni ralkap phu komh nih ni hnih chung an kah hna i 30 nak tlawm lo an thi, hmapu an tam caah SAC lei nih vanlawng le hriamngan pehtlai in kah an bawmh hna tiah theih a si.
Karen hriamtlai phu komh nih April 16, zinglei 7:00 hrawng in Dawnye-hku khua kiangkap ah hmun a khuar mi SAC ralkap pawl cu an va kah hna caah kahdohnak fakpi in a chuak. SAC ralhraang pawl cu khua chung ah an zaam i SAC nih vanlawng le miakpi in a ralkap pawl kah a bawmh hna ca ah khuami inn cheukhat a kaang tiah Karenni ralkap lei thawngthanhtu phu nih an chim.
“Thla ni 16 zing 7:00 hrawng ah kan va kah hna. Dawnye-Hku cu Dawtamahgyi khuate komh ah a um mi a si. Anmah lei a thi mi 30 hrawng an si lai tiah kan ruah. Hmapu zong an um. Hriamnam kuanzen pawl zong kan laak. Zeizat dah kan laak khawh ti mi cazin belte a fiang rih lo. Kanmah lei KA in pakhat a nunnak a liam. Hmapu tlawmpal an um,” tiah Karenni ralkap lei thawngthanhnak phu in Minister Khu Nye Reh nih Delta News Agency ah a chim.
March zarh khatnak lio ah khan SAC ralkap battalion LIB-12, IB-515 le IB-516 in ralhraang 270 hrawng nih Demawso Nichuahlei cu an rak nam. March 22 le 23 kahdohnak lio ah SAC lei 90 hrawng an thi i 50 hrawng hma an rak pu tiah theih a si. Cu ralhraang phu pawl cu atu ah Dawtamahgyi khuate komh ah umhmun khuar in an cawlcaang peng i April zarh khatnak ah minung 80 nak tlawm lo thazaang an i chap tiah theih a si.
Cu ralhraang pawl cu Karenni ralkap pawl nih a va kah mi hna a si i, April 16 le 17 ni hnih chung kahdohnak ah Karenni hriamtlai phu a si mi KA, KNDF B/10, B/05, B/06, B/01, B/16, B/15, KNDF ETD le Loikaw PDF an i tel tiah cathanh an chuah mi in theih a si.
Cu kahdohnak chung ah cun Karenni ralkap phu komh nih meithal tel in hriamnam zun 13, RPG zun khat, 60MM hriamnam peeng pakhat, RPG bomb thei 13, 60MM bomb thei 11, kut cheh bomb 12, kuan bawm 30 leng, mobile phone, laptop computer le kuanzen phunphun an lak khawh tiah theih a si. (Ref: Delta News Agency)
