Karenni ralkap phu komh nih November 11 ah an kah i a rak tla mi SAC raltuknak vanlawng a mawngtu pahnih lak ah Major rank pakhat cu November 19 ah KNDF nih an tlaih khawh tiah ram chung media hna nih an tial.
An tlaih mi pa cu Major Khine Thant Moe, kum 43 a si i DSA batch 44 a rak kai mi a si tiah theih a si.
“Operation 11.11” ah Karenni ralkap hna nih SAC camp tampi an laak khawh pin ah K-8 phun a si mi raltuknak vanlawng zong kan kah i a tla tiah tu thla November ni 11 ah an rak thanh. A tla mi SAC vanlawng cu Karen ramkulh, Tantaunggyi peng, Kha Mar Di Hpo Li le Mar Yaw Hpo Li khuate kar lo thlaam pawng ah an rak hmuh i a mawngtu pilot pahnih cu parachute in an zuan caah an rak luat.
Parachute in a zuang i a luat mi SAC pilot pahnih lak ah Major Khine Thant Moe cu an tlaih cang i Lieutenant ranak a si mi Zarni Maung cu an kawl cuahmah lio a si tiah kan theih.
