Kahdohnak a fahnak Karenni ramkulh, Shataw peng chung ah kahdohnak bawm ding in a ra mi SAC ralkap nih ramlak ah aa thup mi fapawi pakhat le ngakchia hna tel in minung pasarih cu February 5 ah an thah hna tiah theih a si.
SAC ralkap nih an thah mi hna cu fapawi nu pakhat, pum tling lo nu pahnih, kum 3 le kum 5 pa ngakchia pahnih, kum 7 nu ngakchia pakhat le pa pakhat, an dihlak ah minung pasarih an si tiah theih a si.
“Chungkhar pathum an tlaih hna i lam an i chimhter hna. Cun, lam tantim ah an dihlak in an thah hna. An dihlak pasarih an si. An lu ah hmuahchih in an kah hna,” tiah Karenni Nuhrin Covo Phu nih Myanmar Now ah an chim.
Cu bantuk in, tualchung ralzaam a bu in a thattu cu Eastern Military Command kuttang Minepyin khua hrambunh IB-249 battalion an si tiah Karenni Army (KA) in Colonel Bhone Naing nih a chim.
IB-249 in SAC ralkap 60 leng cu February 5, zinglei ah helicopter pathum in Shataw khua ah an chiah hna tiah theih a si. Cu SAC ralkap pawl cu Karenni ralkap nih an kah hna caah a thi mi la hma pu an um leng ah hriamnam kuanzen an laak khawh ti zong Colonel Bhone Naing nih Myanmar Now ah a chim.
Shataw khuapi kiangkap ah kahdohnak ni fatin a um i SAC nih vanlawng in bomb a thlak lengmang caah khuami hna cu ramlak ah an zaam. January thla chung ah SAC nih vanlawng in bomb a thlak caah inn 40 hrawng a kaang tiah theih a si.
Photo: PKPF
