Dohthlennak kum 3 chung ah Chin ramkulh, Kanpetlet peng chung ah ralzaam 10,000 hrawng an um i, a kenkip in bawmhnak an herh, tiah Kanpetlet peng ukhruaitu bu nih theihternak a tuah.
SAC ralkap nih Kanpetlet peng le Saw peng chung ah raallam a sial ruang ah le vanlawng in kahdohnak a tuah ruang ah Kanpetlet peng chung ah ralzaam 10,000 hrawng an um i, bawmhnak zong ṭhaṭhi in an hmu lo, tiah a langhter.
“Kanpetlet peng chung ralzaam pawl hi bawmtu bu ngan ngaingai zong an ngei lo. Anmahte in an cawlcaang. A chelcaan ah cun NGO bu fa tete cu an rak phan ve tawn,” tiah Kanpetlet peng ukhruainak lei ṭuanvo ngeitu pakhat nih a chim.
Ralzaam hna nih abikin eidin tirawl le sii-ai lei ah bawmh an herh ngaingai, tiah Kanpetlet peng ukhruaitu bu nih May 13 ah ralzaam hna kong he pehtlai in theihternak a tuah.
Kanpetlet peng chung ralzaam 10,000 lak ah 5,000 hrawng hi Magwe ramṭhen, Saw peng chung in Kanpetlet peng ah a zaam mi an si.
A dang ralzaam 3,000 hrawng hi Cindwe kahdohnak ruang ah a zaam mi an si i, a taang mi 2,000 hrawng hi Kanpetlet peng chung khuate pawl in a zaam mi an si, tiah Kanpetlet peng ukhruaitu bu nih a langhter.
