Kanpetlet peng ah SAC ralkap nih kum 65 hrawng a si mi tualchungmi pa pakhat meithal in an kah i, a dang khuami 150 leng an zaam, tiah thawng kan theih.
SAC nih vanlawng in a thlah mi SAC ralkap pawl cu April 3 ah khan Kanpetlet peng Phianchawng khuate ah an phan i Chin hriamtlai bu hna he kahdohnak a chuak.
Phianchawng khuachung ah SAC ralkap pawl an luh lio ah a dang khuami 150 leng cu an zaam dih nain a zaam kho lo mi kum 65 upa pakhat cu SAC ralkap nih meithal in an kah i a nunnak a liam, tiah Kanpetlet peng mizapi ukhruaitu bu nih a langhter.
Cu lawng si lo in a zaam kho lo mi kum upa pahnih zong an um ve rih i, cu hna cu atu tiang an umnak le an sining theih a si lo.
SAC ralkap pawl cu Phianchawng khuachung ah hmunhma an la i, khuachung inn pawl zong an khangh hna. Atu tiang inn zeizah dah a kangh cang ti mi fiang in theih a si lo, tiah Kanpetlet peng mizapi ukhruaitu bu nih theihternak a tuah.
