Sagaing ramthan, Kanbalu peng, Pazigyi khuate ah Zung honnak puai an tuah i cu zung honnak hmun ah cun siangngakchia le khuami pawl an kai lio ah SAC ralhraang nih vanlawng in bomb a thlak ca ah a thi mi 100 leng a si cang tiah theih a si.
April 11, zinglei suimilaam 8:05 hrawng ah Kanbalu peng Pazigyi khua ah SAC ralhraang nih raltuknak jet vanlawng in voi khat, Mi 35 helicopter in voi li bomb a thlak. Honnak caan hman lio a si caah a thi mi 100 leng a si cang tiah theih a si.
“Ruak a him deuh in char mi 53 an si. A rel kan i harh ngaingai. Rel awk a tha lo i a pum le a lu aa thenthek mi ruak an tam tuk. Mit hmuh ning in cun a thi mi 100 leng an si mi fehter khawh a si cang. Bomb an thlaknak hmun cu a zualhma tuk i zeitin dah ruak kan rel hna lai ti awk hmanh kan hngal lo,” tiah a hmun ah bawmhchanhnak rian a tuan mi pakhat nih a chim.
“Ngakchia ruak zong an tam tuk. Nu pawl zong an tam. Cheukhat ruak cu an pum aa thekdarh dih. Minung an si hmanh hngalh khawh lo awk in an um,” tiah tualchung mi pakhat nih a chim.
Atu ahcun vanlawng nih bomb a thlaknak hmun ah khuami cheukhat an phan cang nain fimtawl bawmhchanhnak tlawmte lawng tuah khawh a si rih. Hmu pu zong an tampi i sii-ai thlopbulnak an tuah kho rih lo tiah theih a si. (Ref: Khit Thit Media)
