Facebook cahmai ah account deu (min deu) in Chin Ramkulh Minister le Biaknak upa ka thah hna lai, tiah catialtu cu upadi ning in taza kan cuai lai, tiah Minister Pu Soe Htet nih June 11, The Hakha Post ah a chim.
“Hiti facebook cahmai ah catialtu hi kan hngalh ko. Asinain, upadi ning tein tazacuai kan timh. A ruang cu kan nunnak tiang hrocer le thihphaih kan si tik ah a sawhsawh in daihter kan tim lo. Ka thah hna lai, a kan ti mi hi keimah le Salai Isaac Khen le Paletwa Rev. Steven kan si. Cun, Rakhine Mino Chanhchuahtu Phu zong nih AA he pehtlaihnak a ngei mi an si, tiah an kan purhdah fawn ca ah upadi ning tein tazacuai an si lai. Zohsawh kan i tim lo,” tiah Chin Ramkulh Cozah Chimphuannak Nawlngeitu Sipin Minister Pu Soe Htet nih The Hakha Post ah a chim.
Hi kong ah Pu Soe Htet nih, “Catialtu hi Rakhine minung a si kan hngalh ko. Facebook account deu in Pu Soe Htet le Salai Isaac Khen hi ka thah hna lai. Cun, Biaknaklei riantuantu Rev. Steven zong ka hmuhnak poh ah ka thah lai, tiin a facebook cahmai ah a taar mi kan hmuh ca ah zohsawh kan tim lo. A ruang cu miphun i huatnak tiang a chuahpi kho mi buainak pakhat a si ca ah a si,” tiah Minister Pu Soe Htet nih a chimchap.###
