Sagaing ramthen, Kalaywa peng, Mahsing Sanpiah khua palek checkgate sakhan cu nihin zing suimilaam 5:00 ah min hngalh lo mi hriamtlai phu nih an luhnawh hna i palek 4 le sakhan hmu fapa pakhat an thi tiah tualchung mi sin in kan theih.
September 18 zing suimilaam 5:00 ah an luhhnawh hna hi a si i palek 4 le sakhanhmu fapa pakhat tel in 5 an thi, sakhan cu mei in an khangh, meithal cu an i kalpi. Atu cu ralhraang le palek tampi a phan tiah tualchung mi pakhat nih a chim.
“Kalaywa peng, Mahsing Sanpiah palek sakhan an luhhnawh hna. Palek sakhan hi tlanghram ah a si i tlangcung in an rak kah hna hnu ah an rak tum. Palek 4 an thi, sakhan hmu fapa zong a thi ve. Hi sakhan ahhin 40 hrawng an um. Namsawh case ah a kal mi an um i an tlawm lio te ah an rak kah hna hi a si. Sakhan cu mei in an khangh ta i methal pawl cu an i kalpi. An i kah hi zing suimilaam 5:00 in suimilaam 8:00 tiang a si. Suimilaam 9:30 hrawng ah ralhraang pawl an rak phan. Atu cu lam an kham i checkhlatnak an tuah. Tualchung mi zong an um ngam ti lo i aa naihniamnak hmun dang ah an zaam hna. Atu hi a voi khatnak a si. Kalaywa peng, Mawleik he zong aa naih” tiah tualchung mi pakhat nih a chim.
Sagaing ramthen Kalaywa peng zong Internet line an phihnak hmun a si i palek sakhan luhhnawhnak thawngpang zong a dai ngai. Tualchung mi zong an lungre a thei ngai. Ralhraang thazaang tampi an kal tiah theih a si.
