SAC ralkap nih Kalaymyo in Chinram lei ah eidin tirawl phorh an khamnak ni tlawmpal a si cang, tiah thawng kan theih.
Chinram lei ah phorh dingmi facang le a dangdang eidin tirawl pawl cu Kalay University pawng i Check Point in SAC ralkap nih an kham dih hna, tiah tualchungmi nih an chim.
Tualchungmi pakhat nih, “Kan hnu Zarhte Ni thawk khan a kham. Atu ni in cun an khamnak ni li a si cang. Motorcycle zong in zei bantuk in eidin tirawl hmanh phorh khawh a si lo,” tiah Chin World ah a chim.
“Facang pi khat zong phorhnak nawl an pe lo. Mawtaw cung in an ṭhumhter dih hna. Electric thilri zong phorh khawh a si lo. Sii-ai tu cu company theihpinak catlap tel in phorh khawh a si,” tiah tualchungmi pakhat nih a chim ve.
Tedim khuami pakhat zong nih Kalay lei in Tedim khua ah facang a luh lonak ni nga hrawng a si cang, tiah Chin World thawngzamhnak ah a chim.
