Kalaymyo Taing-yin sii -inn ah COVID-19 zawtnak in aa thlop mi minung pahnih cu damnak an hmu than i 2020 May 18 zaanlei sang ah sii-inn in an chuak than cang, an dihlak minung 6 an si.
Kalay khuapi ah COVID-19 zawtnak ngei minung paruk an um i minung paruk chung ah Case No.74 cu voi hnih tiang zawtnak an cheknak ah a phichuak negative a si ca ah 2020 May 8 ah sii-inn in an chuahter. Cun, Case No. 115, 116 le 117 zong an phichuak negative an si ca ah 2020 May 15 ah sii-inn in an chuahter than hna tiah kan theih.
2020 May 18 ah damnak a hmu than mi Case No.88 le Case No.114 an damnak kong he pehtlai in Kalay Taingyin sii-inn Lutlai min langhter duhlo mi pakhat nih, “Mizaw Case No.88 le 144 hi voi hnih tiang an zawtnak cheknak tuah than a si i, a voi hnih tein negative an si ca ah sii-inn in chuahter an si. Sii-inn in an chuah dih hnu zong ah Ngandamnak Zung lei nih a tuah ning in ni 14 chung Home Quarantine ah chiah an si lai i, ni 14 chung a dih in zalong tein tlonlen khawhnak nawl pek an si lai,” tiah The Hakha Post ah a chim.
Kalay khuapi COVID19 in a zaw mi Case No.74 le 88 hi Myanmar ramchung ah COVID-19 zawtnak ngei an hmuh hmasa bik mi Tedim Peng Kaptel khuami Pa Tuang Suan Khai nih a chonh mi hna an si i, Case No. 114, 115, 116, 117 hna hi Case No.88 i a chungkhat an si tiah kan theih.
Photo/ Internet
