Sagaing Ramthen Kalaymyo ah COVID-19 zawtnak a ngei mi minung 4 hmuhchap an si tiah Ngandamnak le Zaanglek Minister Zung nih September 29 zaan lei suimilaam 8 ah a thanh.
Zawtnak an hmuh mi hna kong he pehtlai in Kalaymyo Sii-inn ah nurse a tuan lio mi minchim duh lo minung pakhat nih, “Kalaymyo ah COVID-19 zawtnak a ngei mi he naihniam in a um mi hna minung 4 sin ah hmuhthan a si. Minung pakhat hi Letpanchaung khuami a si. A taang mi minung pahnih hi Kalaymyo sanmyo sang ah a thudir mi an si,” tiah The Hakha Post ah a chim.
Zawtnak a ngei mi hna chung ah Letpanchawng khua A sang ah a um mi nu pakhat kum 69 nu a si, Sanmyo No.4 sang ah kum 50 pa pakhat le Sanmyo No.4 sang ah a um mi nu kum 28 nu hna an si. Cun Sanmyo sang chung ah COVID-19 zawtnak ngei he naihniam in a um mi pa pakhat sin zong ah COVID-19 zawtnak hmuh a si tiah Sii-inn nurse a tuan lio mi nih a tang lei bantuk in The Hakha Post ah a chim.
“Thil ei mi le a dangdang ah a haw ka thei kho lo a ti i Kalaymyo sii-inn ah a thi an chek i COVID-19 zawtnak hmuh a si. Sangmyo Sang a si. Kum 47 pa pakhat a si. Annih hi cu Quarantine ah an chiah mi a si lo. Zawtnak a ngei mi an dihlak in Kalaymyo Taingyin sii-inn ah chiah an si cang hna,” tiah a chim.
Kalaymyo ah COVID-19 zawtnak a ngei thar mi minung 4 an hmuhchap hna, COVID-19 zawtnak a ngei lio i sii-inn ah aa thlop mi an dihlak minung 13 an si. Quarantine ah a lut mi minung 164 an si tiah kan theih.
