Sagaing ramthen, Kalay khuapi ah a voi khatnak Coronavirus Disease-2019 (COVID-19) zawtnak hrik ngei an hmuhnak sang cu Ramthen cozah lei nih lockdown a tuah i zawtnak hrik/rungrul thahnak sii zong 2020 April 15 ah a kah tiah kan theih.
Kalay khuapi ah COVID-19 zawtnak hrik ngei an hmuh hi 2020 April 15 ni zinglei sang ah a si tiah Ramkomh Ngandamnak Zung nih mizapi sin ah a thanh.
Lockdown an tuah mi kong he pehtlai in Kalay Pengkomh uk U Khin Mg Choe nih, “2020 April 15 zinglei sang lawng ah kan theih. Kan i ralrinnak le kan i runven khawh nakhnga ca ah tiin kan theih le caangka Lockdown kan tuah colh ve. Zawtnak hrik a ngei mi pa he aa pehtlainak sang le lam kip cu kan phihkhar dih. Sii kahnak aa tlak mi zong kan kah dih cang,” tiah The Hakha Post ah a chim.
Zawtnak hrik a ngei tiah Myanmar Ramkomh Cozah nih a thanh mi pa hi Kalay khuapi, Tat-Oo-Thita sang ah a um mi a si. Hi mi pa hi Myanmar ram chung ah a pakhatnak bik COVID19 zawtnak hrik ngei mi No.1 Tedim pa he naihniam tein a um bal mi an si tiah Dr. Khin Mg Nge sin in kan theih.
COVID-19 zawtnak hrik a ngei mi chung in No.1 pa he aa naihniam mi, a tlongleng mi minung pathum zong zawtnak hrik an ngei ve i Tedim sii-inn pi ah an chiah hna tiah kan theih. Tedim sii-inn pi ah ngandamnak lei zohkhehnak thilri a tlin lo tuk ca ah Kalay sii -innpi ah thial an timh hna nain Kalay Khuanu Khuapa le zatlang bu cheukhat hna nih an cohlang duh hna lo tiah kan theih.
