Kalay zatlang sii-inn pi rian ngeitu cheukhat, Chin siangngakchia bu 15 nih duh lonak lam an zawh hnawh
2020 January 26 ah motorcycle cang sualnak in a nunnak a liam mi Myanmar ram pumpi Zomi sianghleirun siangngak bu Chairman Tg Dal Mun Mang kong he pehtlai in Kalay zatlang sii-inn pi rian ngeitu pawl dantat ding in Chin Siangngakchia bu 15 nih 2020 February 10 ah duh lonak lam an zawh tiah kan theih.
Hi kong he pehtlai in lam zawhnak ah rian ngei upa Salai Lian Suan Piang nih, “Rian ngeitu hna sin ah tha tein tuanvo kan lakpiak uh tiah cathanh zong kan rak chuah, nawlnak zong kan rak tuah ko nain zei an kan relpiak lo. Cathanh kan rak tuahmi chung ah ninga caan kan rak pek hna, ninga a tlin cang hnu zong ah zeihmanh cu kha an chim lo ca ah atu bantukin kan cathanh ning tein lam kan zawh ve hi a si,” tiah The Hakha Post ah a chim.
Lam zawhnak ah catar an tarmi cu, Emergency i khamhnak hnga ding budget ngah kan duh, Myanmar rampi ngandamnak lei budget 10% in chap uh, zohkhenhtu ngei lo tiin zohkhenh loin an um lo nakding tuanvo kan lakpiak uh, a felfai lomi siibawi le nurse sii-inn ah rian tuan hna hlah seh tiin catar an i ken.
Cun, Committee upa Salai Kap Lian Thang nih, “hi kong he pehtlai in a liam cia caan ahkhan cathanh kan rak chuah cang. Kha cathanh kan chuah mi he zohthan in a herh mi poh kan chapchuan than lai ramkulh cozah nawl ngeitu hna sin ah kan kuat lai. Hihi rianrang in atu zarh chung ah kan tawlrel lai,” tiah a chim.
Tg Dal Mun Mang hi January 26 Kalay Myomah Bazar hmai ah cycle a cangsual i, Kalay zatlang sii-inn pi ah an kal pi colh nain tha in an zohkhenh lo ca ah January 27 ah a nunnak a liam mi a si tiah theih a si. Hi lam zawhnak ah Chin siangngakchia minung 3000 leng nih Kalay sethmuh zung hmai in lam an zawh tiah kan theih. (By: Salai Tluangte)
2018-2019 Hakha A.G.T.I. Diploma Degree peknak Carson Hall ah an tuah
Associate-ship of Government Technical Institute Hakha 2018-2019 cacawn kum ah minung 108 nih Diploma Degree 2020 February 8 ah an la tiah kan theih.
A.G.T.I lutlai Dr. Salai Tluang Za Thang nih, “ kan sianginn hi a liam cia kum 2008 December 15 in dirh mi a si. 2008-2009 cacawn kum ah kum khatnak a rak kai mi hi minung 31 an rak si. 2019-2020 cacawn kum in kan sianginn pi hi kum 10 a si cang. Kum 10 chungah siangngakchia minung 586 nih an kai. A.G.T.I Diploma a awng minung 399, B.Tech Degree a ngah mi minung 128 le B.E kai khawhnak certificate ngah mi minung 133 an si cang,” tiah The Hakha Post ah a chim.
A.G.T.I degree pek hi atu kum in a kum 4nak a si i, Civil major in minung 35, Electronic Communication major in minung 27, Electronic Power major in minung 17 le Mechanical Power major in 29, zate fonh minung 108 nih Degree an la.
