Sagaing ramthen, Kalay peng Thlanglei, Htomar le Thayarkone khuate kar kahdohnak ah SAC ralkap pariat an thi tiah NUG, Runvennak Minister Zung kuttang, No. 1 Military Command nih a thanh.
Htomar khua in aa thawh mi SAC ralkap le pyusawhtee fonh minung 60 hrawng cu Htomar le Thayarkone khua kar ah CDF-KKG, Vakok PDF, RKDF le Kalay pengkomh PDF battalion-2, 4 le 5 nih March 2 ah an kah mi hna a si.
Cu kahdohnak ah cun SAC ralkap 8 an thi i 20 hrawng hma an pu tiah theih a si.
Kahdohnak ah SAC hriamnam a si mi MA zenthong 3900, G-3 zenthong 101, kut cheh bomb 3, 40mm bomb thei 33, 60mm bomb thei 4, Inaga 1, RPG-7 pali, RPG zen bawm 4, MA kuan bawm 9, bullet proof plate 2, mobile phone 4, dahmei 5 le tangka Kyats 64000 an laak khawh tiah thawngthanhnak ah an langhter.
Photo: No. 1 Military Command
