Kalaymyo Thlanglei, Tharsi khuate kahdohnak ah SAC ralhraang le Pyusawhtee 30 hrawng a thi mi le hma pu an um tiah Ranger Kalay Defend Force (RKDF) nih nihin ah an thanh.
Kalaymyo Thlanglei ah a um mi Tharsi khuate cu SAC ralhraang nih June 25 ah miakpi in voi tampi an kah i, SAC ralkap 120 hrawng nih phu thum ah i then in an nam hna. Cu ralhraang phu cu tualchung rammi rungvengtu ralkap phu komh nih an doh hna.
Cu kahdohnak cu June 25 zinglei suimilaam 9:00 in zanlei 5:00 tiang, chung nitlak deng a rau i SAC ralhraang nih inn 7 an khangh.
SAC ralhraang pawl cu umhmun an khuarnak hmun ah zanlei sang in an kir than tiah RKDF nih thawng an thanh.
Cu kahdohnak ah cun SAC miakpi kah mi ruang ah khuami pahnih hma an pu i CNDF in pakhat nunnak a liam. CDF (KKG) ralkap pathum le PDF ralkap pakhat hma an pu tiah kan theih.
Cu kahdohnak cu RKDF, UGF Ninja, CNDF(VAKOK), PDF(Kalay), CDF(KKG) le Kalay peng Chaklei PDF hna i bawm in an tuah mi a si tiah kan theih.
(Photo: RKDF ralkap pawl hmanthlak hlun a si.)
