March 29 zaanlei sang ah Kalay peng Lai khua Kyarinn le Sithar khua karlak ah ralkap le kiangkap khuami hna an i kap i ralkap lei in a tlawm bik pathum an thi tiah kan theih.
An i kah caan hi zaanlei suimilaam 5:00 hnu in a si i rammi lei in a thi mi cu an um lo, hma a pu mi pakhat a um tiah kan theih.
“Ralkap lei in a thi mi le hma a pu mi zat fiang in theih khawh a si lo nain motor cung ah a thi mi an khin mi hna hi a tlawm bik ah pathum cu an si lai. Panga an thi a ti mi zong an um. Rammi lei pakhat a ke ah meithal kuan nih a khen mi a um nain a nunnak thinphang cu a si lo,” tiah kiangkap khuami pakhata nih The Hakha Post ah a chim.
Kalaymyo Tahan ah ralkap le rammi i kahnak a um ca ah Kalay ralkap nih Gangaw lei ralkap bawmh an hal hna ti mi thawng a leng. Cucaah Gangaw le Kalay karlak khua pawl nih hmun tampi ah lam an kham. Cu lam an kham mi cu Kalay ralkap nih motor pathum le back faw in hmun khat hnu hmun khat an hrawh i Kyarinn le Sithar karlak an phanh ah atu bantuk in kiangkap khuami hna he an i kah hi a si tiah kan theih.
Caan tlawmpal an i kah hnu ah ralkap pawl cu kalay lei ah an kir i Thoh-Cianh khua an lonh ah meithal zun thum hrawng an puah tiah kan theih. Atu an i kahnak hmun hi Kalaymyo in Thlanglei meng 10 tluk a hlatnak hmun ah a si. Hi thawng he pehtlai in a thi mi zat le hma a pu mi zat cu The Hakha Post nih fehternak kan tuah kho rih lo.
