Nizaan March 20 ah a cang mi Kalay peng chung kahdohnak ah dohthlengtu ralkap bu fonh lei in ralkap pahnih an nunnak a liam, tiah theih a si.
March 20 ah Kalay peng, Kyaungtiek khua kiangkap ah SAC ralkap le dohthlengtu ralkap bu hna karlak ah kahdohnak a chuak i dohthlengtu ralkap bu lei in ralkap pahnih an nunnak a liam i, a dang ralkap pasarih hliamhma an pu.
Kalay peng dohthlengtu ralkap nih, “Kyaungtiek khua chaklei le thlaklei ah SAC ralkap pawl hmunhma an la. Kahdohnak cu nitin ti awk in a um. Nizaan kahdohnak ah kanmah lei in ralkap pahnih an thi i hliamhma a pu mi zong an um. Anmah lei zong in a thi le hliam tuar an um ve,” tiah Zalen ah a chim.
Kyaungtiek khua ah a um mi SAC ralkap le Pyosawhti pawl cu March 16 ah dohthlengtu ralkap bu fonh nih an doh hna i Kyaungtiek khua cu an rak laak khawh.
Kyaungtiek khua laak kahdohnak ah dohtlengtu ralkap bu lei in minung pahnih nih nunnnak an pek i, nizaan kahdohnak zong ah a dang ralkap pahnih an nunnak a liam ṭhan hi a si.
