Nizaan February 22 ah a cang mi Kalay peng kahdohnak ah Chin miphun ralkap chung in minung 5 an nunnak a liam, tiah thawng kan theih.
Nizaan kahdohnak ah mipi hriamtlai bu SR6 in Dtea a nunnak a liam i a ruak cu nihin ah an vui.
Sekan khua laak kahdohnak ah Chin hriamtlai bu fonh lei in CNDF ralkap pali zong a nunnak a liam, tiah tualchung media nih an langhter.
A nunnak a liam mi CNDF ralkap pali lakah hin CNDF hruaitu (Vice Chief of Staff-VCS) zong aa tel.
VCS le ralkap pahnih hi Aungtaya khua pawng ah SAC ralkap le Pyosawhti nih an tlaih hna i an thah hna. Cun, CNDF ralkap Mang Pu cu Sekan khua kahdohnak ah bomb aa lamh caah a nunnak a liam.
CNDF in a nunnak a liam mi hna cu: VCS David New, A Nge, Mang Pu le Amos an si, tiah CNO-Upper Chindwin Region nih a langhter.
2023 September ah SAC ralkap nih an rak luh hnawh i mei in an khangh mi Sekan khua cu Chin hriamtlai bu fonh nih nizaan February 22 ah tlamtling te in an laak khawh.
Sekan khua kahdohnak ah SAC ralkap lei in minung 5 hrawng an thi ve, tiah theih a si.
