April 5, 2023
Kalay peng Chaklei, Pyindawoo khua kiangkap kahdohnak ah SAC lei in pasarih an thi tiah CDF-KKG nih nihin April 5 ah an thanh.
March 31 ah Nansaungpu khuate in a rak i thawh mi SAC ralhraang, Pyusawhtee pawl le CDF-KKG cu Pyindawoo thlaanhmun ah suimilaam pathum chung kan rak i kap hmasa tiah an thanh.
Cu kahdohnak ahcun TCDF, CNDF, PDF Kalay, HNB, CR, PDA, LDF, CDM Siyin hna nih an rak kan bawmh hnu in kahdohnak a faak chin i SAC lei nih miakpi in kah a bawmh hna lawng si lo in raltuknak helicopter pawl hmang in vanlei kahdohnak a tuah tiah CDF-KKG nih an langhter.
Cu kahdohnak ah cun a thi mi SAC ralkap pasarih ruak kan mit nih a hmuh i MA 3 zenthong bawm pakhat, 5.56 zenthong 20, naam pakhat, rocksai pakhat le raal thilri pawl kan laak khawh. CDF-KKG lei in ralkap pakhat hma a pu tiah an thanh.
April 1 ah raal lam sialnak kan tuah i MA 3 zenthong bawm pakhat le 5.56 zenthong pariat kan laakchap tiah an langhter.
April 2 le 3 zong ah kahdohnak aa peh i SAC lei an fah caah helicopter pawl hmang in rammi ralkap voitampi an kah hna. Rammi ralkap lei in hma pu an um lo i SAC ralhraang lei a thi mi le hma pu zat zong fehter khawh a si lo tiah an langhter.
Atu ah cun SAC ralkap pawl cu Nyaungkone khua phungki inn le Pyindawoo khua kiangkap ah thazaang tampi he umhmun an khuar i, cuka hmun in pawngkam khuate pawl an nam hna ca ah zeitik caan poh ah kahdohnak a chuak kho tiah CDF-KKG nih an thanh.
