Myanmar ram chung ah COVID-19 zawtnak a chuahka 2020 March 23 in nihin tiang Sagaing Ramthen chung ah COVID-19 zawtnak ngei dihlak minung 452 an si i, hi chung ah minung 11 an nunnak a liam cang tiah theih a si.
Zawtnak ruang ah a nunnak a liam mi minung 11 hna hi a tam deuh cu, kum upa an si cang. Cun, 2021 January 26 i a nunnak a liam mi kum 26 nu pakhat hi ngakchia cem a si. Kalay COVID-19 Response Committee Chairman le Kalay Penguk Zung Lutlai U Nyi Nyi nih, “COVID-19 zawtnak a chuahka in nihin tiang Kalay ah zawtnak ngei dihlak minung 452 an si cang. Hi chung ah zawtnak in a thi mi dihlak minung 11 an si. 2021 January 25 ahkhan Home Quarantine ah chiah mi pakhat a thi i a thih hnu ah kan chek. Kan cheknak ah zawtnak hmuh a si. Cun, 2021 January 26 zong ah kum 26 upa nu pakhat dam lo ruang i sii-inn ah aa rak piah mi a nunnak a liam ve. January 26 zing i a nunnak a liammi nute hi cu amah he naihniam in a um mi cu an um lo. A nunnak a liam mi hna hi a tam deuh cu kum upa deuh an si,” tiah The Hakha Post ah a chim.
2021 January 25 zaan suimilaam 8:00 i Ramkomh Ngandamnak le Zaanglek Zung nih a thanh mi chung ah mizawthar minung 383 an i chap i, nihin tiang zawtnak ngei hmuh mi minung 137,957 an si cang. Zawtnak ngei minung 137,957 chung ah a thi mi minung 3,069 le damnak a hmu i sii-inn in chuahter cang mi minung 122,116 an si.
