Media cu mupi mit bang mizapi mit fiantertu a si.

Kalay khuapi ah COVID-19 zawtnak in a thi minung 12 an um cang

Sagaing Ramthen, Kalay khuapi chung COVID-19 zawtnak a ngei mi minung 455 chung ah, 2021 January 27 ahkhan zawtnak in kum 62 upa pakhat a thi than i nihin tiang zawtnak in a thi mi minung 12 an um cang tiah rian ngeitu hna sin in thawng theih a si.

Hi kong he pehtlai in Kalay COVID-19 Response Committee chungtel le Cozah thawngthanhnak zung Lutlai U Ngi Ngi nih, “Kalay ah zawtnak in a thi mi hi an tam pah ngai cang. January 27 ahkhan Kalay Taing-yin sii-inn ah chiah mi kum 62 upa pakhat a thi i, nihin tiang zawtnak in a thi mi minung 12 an si cang. Atu a  thi mi hi Pinlung sang No.3 ah a ummi a si,” tiah The Hakha Post ah a chim.

Kalay khuapi i COVID-19 zawtnak in a thi mi hna hi a tam deuh cu caan sau zawtnak a ngei cia mi an si. Cun, atu a thi mi kum 62 upa zong hi zunthlum zawtnak, thikai zawtnak a ngei mi a si. Kalay khuapi ah COVID-19 a chuahka in nihin tiang zawtnak ngei dihlak minung 455 an si cang. Minung 455 chung ah minung 412 hi an dam cang ca ah sii-inn in an chuahter cang hna tiah kan theih.

Atu Kalay khuapi ah COVID-19 zawtnak in sii-inn ah zohkhenh lio mi hi an dihlak ah  32 an si  tiah rian ngeitu hna sin in theih a si.

Related Posts

Local News