Chinland Council chungtel Chin miphun ralkap hna nih nizan ah an lakmi Tedim peng, Taingen khua lei ah nihin January 17 zinglei ah SAC ralkap 60 hrawng an rak kai, tiah thawng kan thanh.
Hi SAC ralkap 60 hrawng hi Taingen lei ah an rak kai taktak lai le kai taktak lai lo fiang in theih a si lo i, Chin miphun ralkap pawl Kalay lei ah an rak ṭum lai timi an phan ca zong ah a si kho, tiah CDF CDM-Siyin chimnak nawlngei nih The Hakha Post ah a chim.
“Nihin zinglei ah khan SAC ralkap 60 hrawng cu Kalay, 9-miles in Taingen lei ah an rak kai timi kan theih. Kan theih tiang ah Coffee dum pawng ah an phan. Asinain, an rak kai taktak lai le kai taktak lai lo a fiang lo. Kan ngiat ko hna. Kanmah lei ralkap pawl Kalay lei ah an rak ṭum lai timi an phan caah pawngkam runvennak an tuahmi zong an si kho,” tiah a chim.
Taingen khua cu Kalay-Falam-Hakha le Kalay-Tedim-Rihkhawdar pehtlaihnak lampi aa tonnak zawn ah a ummi abiapimi hmunhma a si caah SAC ralkap nih lak ṭhan ding in an rak kai zong ah timhcia tein kan um ko, tiah a chim chap.
“Taingen khua hi cu ṭha tein runven khawh kan i zuam lai. Runvennak a dotdot zong in kan tuah lai. Atu ah SAC ralkap pawl hi rak kai hna hmanhsehlaw doh ṭhan ding in timhcia tein kan um ko,” tiah a chim.
Chinland Council chungtel Chin miphun hriamtlai bu a simi hna CNA, CDF CDM Siyin, CDF Hakha, CDF Thantlang, CDF Hualngo, CDF Zanniatram, CDF KKG, PDA le TCDF nih Taingen khua cu January 12 zaanlei in an rak doh i, nizaan January 16 zinglei ah tlamtling tein an lak khawh.
