Sagaing ramthen, Kalaywa in Minkin lei ah Yagyi lam zawh in a kal mi SAC ralhraang 130 phu kan kah hna i hriamnam tampi kan laak tiah PDF hmunpi nih a thanh.
Cu ralhraang phu cu riahcaw, minung le hriamnam thazaang chap ding ah FAW motor pathum in an ra i palek le Pyusawhtee pawl an i tel. PDF nih June 16 zinglei suimilaam 8:00 hrawng ah an kah hna tiah theih a si.
Cu kahdohnak ah cun SAC motor pahnih mei in an khangh khawh i MA-11 zun 2, G-3 zun 2, MG3 machine gun zun 1, MA-7 60 MM miakpi zun 1, pistol zun 1, MA-11 kuan bawm 3, G-3 kuan bawm 6, MA-7 bomb thei pawl, RPG bomb thei pawl, M-14 bomb rap 2, kut cheh bomb 30 leng, zenthong tampi le jammer pakhat an lak khawh tiah PDF hmunpi nih a thanh.
Kahdohnak ah PDF lei hmapu um lo tein hnulei ah an kir kho i SAC lei a thi le hma pu zat hngalh a si rih lo tiah an thanh.
