Mandalay khua he meng 40 lawng a hlatnak hmun ah a ummi Pyin Oo Lwin khua ah kahdohnak a chuak cang lai timi thawngpang a hun len ngai caah SAC chungkhar le Non-CDM chungkhar pawl zaam hram an thawk, tiah theih a si.
A zaammi hna lak ah SAC ralkap bawi chungkhar pawl, palek chungkhar pawl le CDM a tauh lomi zung rianṭuan chungkhar pawl an i tel.
Thawngpang hram minung pakhat nih, “Lashio khua i Nichuah-Chaklei SAC Command Center pi a tlukmi thawngpang le ralbawi pawl tlaih an tonmi thawngpang nih Pyin Oo Lwin ralkap chungkhar pawl thinphang tuk in a chiah. Pyin Oo Lwin zong a rauh hlan ah an tuk lai timi thawngpang zong a leng ngaingai. Cucaah, ralkap, palek le zung rianṭuan chungkhar tampi Mandalay lei ah an zaam hna,” tiah a chim.
Pyin Oo Lwin khua ah a ummi SAC ralbawi chungkhar pawl, palek chungkhar pawl le CDM a tauh lomi zung rianṭuan chungkhar pawl cu nizaan August 7 thawk in zaam hram an thawk i a zaammi an tam tuk caah Pyin Oo Lwin in Mandalay lei kalnak mawtaw lampi zong caan zeimawzat chung a pit, tiah theih a si.
