Shanram chaklei, Lashio khuapi kahdohnak a chuah cuahmah lio ah thonginn bauh in a zaam mi thongtla 2500 leng lak ah 100 an thi, taih theih a si.
Lashio khuachung ah TNLA le SAC ralkap an i kah cuahmah lio July 28 ah Lashio thonginn cu thongtla pawl nih an bauh in an zaam hna.
Tualchungmi pakhat nih, “Thonginn hi anmahte in an bauhmi a si. Hi lio a hin thonginn pawng ah kahdohnak zong a um. Thongtla a thimi pawl hi meithal in kah ruang ah a thimi an tam deuh. Aho lei nih dah an kah hna timi belte fiang in theih a si lo,” tiah a chim.
Thonginn in a zaammi thongtla 2500 leng lak ah 1700 hrawng hi TNLA nih an zohkhenh hna i, a dang 800 hrawng hi atu tiang an sining theih a si lo.
Lashio Thonginn ah SAC nih thong an thlakmi hna ramkhel thongtla pa 300 le nu 70 zong an luat, tiah theih a si.
