Chin Ramkulh Paletwa Peng chung kahdohnak a chuah lengmang ca ah siangsangruun sianginn kip ah sianginn ca chim saya/ma te kal ngam loin an um i nulepa zong lungreithei in an um tiah Paletwa Peng Fimcawnnak Zung Lutlai Pu Aung Myin sin in kan theih.
“Paletwa Peng chung i siangsangruun sianginn kip ah ti awktlak in sianginn cachim saya/mate an tlawm. Paletwa in hmun dang ah aa thial mi cu an tam tuk nain Paletwa Peng ah rian rak sok mi le tuan aa tim mi hi an um tuk lo. Hi bantuk in thil a si ca ah siangsangruun sianginn ca chim saya/mate an i nguhdeih bak lo. Nulepa zong lungrethei in an um. Hi bantuk in kan Peng chung ah riantuan an ngamh lonak zong hi ral ruang ah a si bik ko ,” tiah Pu Aung Myin nih The Hakha Post ah a chim.
Paletwa Peng, Tantawung khua i sianginn ah sianginn cachim saya/ma pahnih lawng an um i khuanu khuapa hna nih anmah thazaang in cachimtu auh an timh tiah thawng theih a si.
Hi kong he pehtlai in Tantawung khua ah sayama a tuan liomi Daw Lay Thida Phyo nih, “Ni khat ni inkhan siangngakchia zong kan cohlan cang hna. Siangngakchia hi a tlawm bik minung 100 leng cu an si lai tiah kan zumh. Hi sianginn ah cachimtu minung pahnih lawng kan si ca ah kan lungre a thei ngai ko,” tiah The Hakha Post ah a chim.
Cun, Tantawung khuabawi min langhter duh lomi nih, “Atu kan khua ah sianginn cachim minung pahnih lawng an si ca ah khuanu khuapa hna i bawm in ca chimtu auh ding in timhlamhnak kan ngei. Kan auh khawh hna a si cun thla khat ah sing 450,000 kan pek hna lai,” tiah The Hakha Post ah a chim.
Paletwa Peng ah sianginn cachim rian a tuantu hna ding hi amah Paletwa Peng chung minung hi rian pe kho hna sehlaw cu hi buainak le lungretheihnak hi a lo ko hnga tiah Pu Aung Myin nih a chimchap.
Paletwa Peng chung lawng ah siangsangruun sianginn 16 le siangsangruun then sianginn 22 dihlak fonh sianginn 38 a um. Hi sianginn 38 chung ah sianginn 13 lawng ah siangngakchia an cohlan khawh rih i a taang mi sianginn 25 cu relrem lonak tete a um ca ah an cohlang kho rih hna lo tiah kan theih.
