Kachin ram, Hpakant sui khur cawhnak hmun vawlei a cimh ruang ah minung 160 leng an thi i, hi hna chung ah Chinmi minung 5 an i tel tiah thawng theih a si.
Hpakant Peng, Chin Nunphung Committee Chairman changtu Pu Ngun Thawng nih, “July 1 suimilaam 4:00PM tluk hrawng ah vawlei voi khat a cim. A voi khatnak vawlei a cimh ah Hakha mi pakhat a thi. Cun, a ruak zong Hakha ah Direct in kan kuatcolh. July 2 suimilaam 8:00AM hrawng ah voi khat a cim than i a voi hnihnak ah Chinmi minung 4 an i tel than. Hi a thi mi hna chung ah Matupi Peng mi kum 23 le Rakhine ram um Chin pa pakhat hi an ruak kan hmu kho rih hna lo,” tiah The Hakha Post ah a chim.
“Kachin ram ah hin Chinmi minung 4800 leng kan um. Cun, midang a thi mi hi cu nulepa le chungkhat hna lungtlinpinak in Laitlang ah kua loin a hmun ah an ruak kan vui ve hna,” tiah Kacin Ram, Chin Nunphung Committee lutlai ah aa tel ve mi Pu Pa Thang nih The Hakha Post ah a chim.
July 4 suimilaam 5:00PM tiang ah miruak an hmuh mi hi minung 172, hliam a tuar mi minung 50 leng le a thi mi hi minung 200 leng cu an si lai tiah a chimchap.
