Kachin hriamtlai KIA nih Kachin ramchung i SAC ralkap sakhaan pawl a laak thluahmah lio ah Kachin ram he a naihnak Tuluk-Myanmar ramri ah raldohnak Tank, Vanlawng le kuan tak pawl hmang in Tuluk nih nihin April 2 ah raldoh cawnnak a tuah, tiah theih a si.
Myanmar ramchung kahdohnak kong a ngiathlaitu thiamsang pakhat nih, “Myanmar ramchung kahdohnak nih Tuluk-Myanmar ramri a hnorsuan nakhnga lo Tuluk nih timh ciammam te in raldoh cawnnak a tuah hi a si kho,” tiah a chim.
Tuluk nih raldoh cawnnak a tuahnak hmun hi Kachin ram, Laiza he ramri aa pehtlai mi Yingjiang peng chung i khuate pahnih kiangkap ah a si.
Atu bantuk in Tuluk nih ramri ah raldoh cawnnak a tuah hnawh hna caah Kachin ramchung ah SAC le KIA karlak kahdohnak a zor deuh kho, tiah a ruattu zong an um.
Kan hnu March 7 thawk in KIA nih Kachin ramchung i SAC ralkap sakhaan pawl doh hram a thawk i nihin ni tiang ah SAC ralkap sakhaan 60 hrawng a laak khawh cang, tiah theih a si.
