Hakha Sangthar samh mi zatceo cu June thla canceo ah mizapi kut kan phanhter lai i a taang mi a cheu zong cu June thla chung lila ah phawtzamh khawh kan i zuam lai, tiah Chin Ramkulh Cozah Lamsuul Minister le Sangthar Samhnak Committee Chairman Pu Sui Thio nih May 12 ah a chim.
“May 9 ah khan kan zohfel dih cang. Atu hi rii an i cuh sual lai ti kan phan ca ah riitung kan phun lio a si. A dih bak in mizapi kut ah kan phanhter cang lai. Hi hmun hi 5 billion a dih ding a si. Lam, lutihor, tibantuk kha a baa in kan tawlrel mi a si ca ah hmun a ting mi hna nih 5 billion a rulh khawh nakding in an liam cio te lai. Hi hmun hi acre 300 hrawng kha A-Group kan ti i cucu kan phawtzamh hmasa lai. Cun, June thla chung thiamthiam ah a taang mi hi kan phawtzamh thiamthiam fawn lai. Hi hmun kan samh mi ah hin High School, Middle School, Primary School, Biakinn, Market, Sang Khuabawi Zung le Certual tibantuk tiang um kho seh, ti kan duh i tlam a tling kho te hnga dek maw,” tiah Minister Pu Sui Thio nih The Hakha Post ah a chim.
Hi hmun samh mi pin ah samh than ding zong a um. “Hakha ah kum 20 cung a um mi, chungkhar cazin a ngei mi, innhlang bak mi tibantuk kha papek a si lai. Cun, Pengtlang dangdang in 2015 kum tlangmincimh lio ah inn rawk i umnak a ngei ti lo mi zong nih khuate in Hakha khua an rak peem duh ahcun papek in kan ruahpiak thiamthiam hna lai,” tiah Minister Pu Sui Thio nih a chimchap.
Hi kong ah Chin Ramkulh Hluttaw Speaker Pu Zo Bawi zong nih May 4 ah, innhlaang le inn ngeilo hrimhrim kan um ti nakhngalo ningcangte le phungning tein kan tawlrel cuahmah ko. Innhlang in a vaak mi, inn ngeilo zong lungrethei in um hlah u, a si khawh chung in kan in tuaktanpiak ko hna, tiah The Hakha Post ah a rak chim bal.
