Kalay, Hakha, Thantlang le Falam hrawnghrang i June 2 ah 2018-2019 taanghra camipuai result a chuak lai, ti mi thangpang a leng mi hi Pyidaungsu in zeihmanh ca chuah mi a um rih lo, thawng vaivuan a si, tiah Hakha Peng Fimcawnnak Zung in thawng kan theih.
“June 2 ah taanghra camipuai result a chuak lai, ti mi hi cunglei Pyidaungsu sin in zeihmanh thawngthanhnak ca a um rih mi a si lo. Cun, June 8 ah a chuak lai, tiin Facebook ah an tial mi tu cu ka hmuh nain cu zong cu a fiang mi a si ve hlei lo. Taanghra camipuai result kong ah cunglei in thawngthanhnak zeihmanh a um rih lo,” tiah Hakha Peng Fimcawnnak Zung Lutlai Pu Thla Chum nih The Hakha Post ah a chim.
2018-2019 cacawn kum ah Chin Ramkulh in siangngakchia 12,103 nih taanghra camipuai an phit i Myanmar ram chung taanghra camipuai a phi mi dihlak hi siangngakchia 890,000 an si.###
