India-Myanmar ramri hoih in lihnin ruang ah Falam Peng, India ramri a ummi Rihkhawdar khuapi ah Cozah Thawngthanhnak Zung inn, Pyidawngsu Khualbuk inn le khuami inn, inn thum a rawk tiah Rihkhawdar Cozah Thawngthanhnak Zung Lutlai Pu Peklawma sin in thawng kan theih.
Nikhua caan zohnak le tahnak zung nih a thanh ning ah 2020 June 22 zinglei Myanmar ram caan suimilaam 5:10 le second 52 ah Hakha Lihninh lei zohfelnak zung nih nitlakchaklei meng 42 a hlatnak, Myanmr ram ramleng (Myanmar-India Border Region), chaklei (North) zeicandah a hlat ti tahnak (Latitude) 23.14 degree, nichuah lei (East) vawlei pum a tunglei tahnak (Longitude) 93.22 degree, a thuh lei 4 kilometer a si mi li aa hnin tiah an thanh.
“Li aa hninh hi zinglei suimilaam 5:10 ah a si. Hi lihninh ruang ah Cozah zung inn hnih le khuami inn inn thum, a dihlak fonh inn 5 a rawk. A rawk mi pawl hi minung um kho lo ding tiang in a rawk lo nain minung um nakding ca ah tih a nung. Inn ngeitu hna hi an dihlak lakhruak in kan thialter chung hna. Inn zuat satil le ram zuat satil pawl a thi le aa hliam an um lo,” tiah Pu Peklawma nih The Hakha Post ah a chim.
Hi lihninh ruang ah Rihkhawdar No.1 sang Pyidawngsu Khualbuk innpi a chunglei a kak, Cozah thawngthanhnak Zung a hmailei vampang an khammi a kak, No.2 sang um Pu Thang Aung inn teih inn dot hnih a tanglei le a cunglei a kak, Pi Zunkim inn le Pu Ngun Nei Ceu te inn cu fak ngai in an rawk tiah theih a si.
Hi lihninh ruang ah Mizoram Aizawl khuapi inn zeimawzat zong a rawk. Cun, Sagain ramthen, Chin Ramkulh Falam, Thantlang, Hakha lei zong ah aa hnin nain a rawk mi an um lo tiah kan theih.
Photo/Internet
