2019-2020 cacawn kum taang 4 le taang 8 camipuai an phit mi cu 2020 June 5 in June 9 chung ah chek a si lai i, June 13 ah result a chuak lai, cun taanghra camipuai phit mi zong June 5 in chek hram an thok ve lai, tiah Romkomh Fimcawnnak Zung nih cathanh a chuah.
COVID-19 zawtnak ruang ah kum dang bantuk in 2020-2021 cacawn kum sianginn hon caan cu June thla ah hon khawh a si lo ca ah sianginn hon khawh than nakding ah tuah ding rian hna cu zulh cio ding in, Ramkomh Fimcawnnak Zung nih June 2 ah a chuah.
“June 5 in June 19 tiang taanghra camipuai chek ding. June 5 in June 9 tiang taang 4 le taang 8 camipuai phit mi chek ding. Cun, taang 4 le taang 8 camipuai chek mi result cu June 13 ah thanh ding le 2019-2020 cacawn kum a dih cang tiah thanh ding. June 15 in June 21 tiang Grade 4 hmaitonh (face to face) in training peknak tuah ding. June 22 in June 28 tiang Grade 7 hmaitonh training peknak tuah ding. June 29 in July 8 tiang Grade 10 hmaitonh training peknak tuah ding. July 4 in July 6 tiang Grade 10 (taang 9) sianginn chung camipuai phit mi le Placement Test chek ding le July 11 result tar ding. July 13 in July 17 chung ah siangsangrun apnak caan a si lai i, July 21 sianginn honter a si lai,” tiah Ramkomh Fimcawnnak Zung nih a thanh.
Hi taang 4 le taang 8 camipuai cheknak kong le result chuahnak kong ah Chin Ramkulh Fimcawnnak Zung lutlai Daw Hnin Gyi kan pehtlaih nain kan pehtlai kho lo.
Sianginn honnak kong he pehtlai tu in cun, Chin Ramkulh Fimcawnnak Zung lutlai Daw Hnin Gyi nih, “Siangsang run hi July 21 ah hon a si lai. Cu hnu ah COVID-19 zawtnak a karh ning le a sining zoh in sianglairun le siangniamrun hna cu hon an si te lai,” tiah The Hakha Post ah a rak chim.
Private sianginn zong Cozah sianginn hon an si hnu in hon an si ve lai tiah kan theih.
