Minung khuasaknak inn le chawlehnak ca hman mi electric man cu April 11, Pyidaungsu Cozah Phu biachahnak in July thla thawk cun mei man a kai cang lai, tiah Pyiduangsu Electric lei Zung nih a thanh.
Minung khuasaknak electric hman ning chung ah innchungkhar umnak, innchungkhar nih hman mi mei thazaang hmannak pawl (Power), chawlehnak aa tel lo mi biaknak inn le biakinn pawl an si. Cu bantuk pawl nih mei hman mi ca ah unit 1 in 30 kar cu Kyats 35, unit 31 in 50 kar cu Kyats 50, unit 51 in 75 kar cu Kyats 70, unit 76 in 100 kar cu Kyats 90, unit 101 in 150 kar cu Kyats 110, unit 151 in 200 kar cu Kyats 120 le unit 201 cung lei poh cu Kyats 125 a si lai.
Innchung ca ah electric hmannak a si lo mi sehzung riantuannak, chawlehnak, ram pumpi huap in chawleh riantuannak, Cozah Zung le NGOs tibantuk pawl ca ah unit 1 in 500 kar ah Kyats 125 in mei man laak a si lai i unit 100,000 leng a kai ahcun Kyats 180 in laak a si lai, tiah Pyidaungsu Electric lei Zung nih a thanh.
“Electric mei thazaang karhternak, mei a hmu rih lo nih mei an hmuh khawh nakding le rian cak deuh le tha deuh in caan sau rian kan tuah khawh nakhnga hi bantuk in electric man kaiter a sinak hi a si,” tiah Myanmar ram Pyidaungsu Electric lei Zung nih a thanh mi chung ah aa tial. (DVB)
