COVID-19 phihkhar ruang ah June thla ah sianginn hon khawh a si lo i Ramkomh Cozah nih July 13 ah sianginn hon ding ti mi cu Chin Ramkulh Cozah zong nih July 13 thok in siangakchia an cohlan cang lai, tiah July 3 ah kan theih.
“COVID-19 ruang ah sianginn hon khawh a si lo cu mizapi hngalh a si ko. Hi kong hi meeting kan tuah lengmang. Nizaan July 3 zong ah tuah a si. Ramkomh Cozah COVID-19 Tawlreltu le Ngandamnak Zung nih July 15 tiang phihkhar nicaan a thawn. Asinain, July 13 ah siangakchia kan cohlan cang hna lai. Paletwa belte hi ralram an si tik ah a fiangfai lo ngai. Peng dang hi cu sianginn cacawnnak khaan le thutdan tibantuk zong ready an si dih cang i cacawn ning, siangakchia le siangcachimtu hna i pehtlaih ning, khaan khat ah minung 20 lawng thut ding le zarh khat dan tibantuk, zing lei le zaanlei a caan then tibantuk zong ready an si dih cang. Amah belte, siangakchia cohlan an si hnu ah an sianginn kai caan cu felfai deuh in thenpiak an si te lai,” tiah Chin Ramkulh Cozah Fimcawnnak, Ngandamnak, Zaanglek le Zaatlang Minister (Social Affairs Minister) Pu Pau Lun Min Thang nih The Hakha Post ah a chim.
Chin Ramkulh chung ah Paletwa belte hi kahdohnak a daih hlei lo ca ah sianginn a dihlak in hon ngam dawh a si lo. Siangcachim zong an chambau ngaingai i siangakchia zong ralzaam camp ah an i dor i sianginn a kai kho lo ding tampi an um, tiah kan theih. Ramkomh Cozah nih siseh, Chin Ramkulh Cozah nih siseh, July 13 in siangakchia cohlan ding a fehter i cacawn ning le sianginn kai ning pawl cu felfai deuh in an tawlrel than te lai, tiah kan theih
