2020 kum America President thimnak ah Joe Biden nih teinak ka hmu cang tiah 2020 November 7 ah mizapi sin a thanh hnu Asia le Africa ram phan Myanmar ram refugee pawl le Malaysia ram phan Chin Refugee pawl ruahchannak an ngei hna tiah theih a si
Hi Refugee pawl an phaknak ram ah riantuan khawhnak nawl, fim cawn khawhnak nawl tlamtling, ngeih khawh ding le US ah umhmun khuar kho ding in Joe Biden nih a kan tawlrelpiak lai, a kan timhlamhpiak lai timi ruahchannak an ngei dih cio hna.
Ruahchannak an ngeih mi kong he pehtlai in Malaysia khuasa, Chin Youth Organization Malaysia chungtel Salai Andrew Tum Tling nih, “President Obama chan ahkhan Chin ralzaam hi kum khat ah minung 6000 leeng US kan phan peng. Kum 8 chung ah minung 50,104 bak Chinmi US kan phan. President Trump nih, 2016 ah teinak a hmuh i amah a tuan chung ah minung 5008 lawng kan phan. 2020 kum chung hna cun Chinmi US a phan mi minung 504 lawng kan si. 2017 kum ahkhan 1759 kan phan i hi kum hi kan tam bik kum a si. Ralzaam kong ahcun Democratic le Republic hi cu an i dang tuk. Trump nih a tuan ka in nihin tiang vawleicung ralzaam minung 15,000 lawng laak ding in minsen a thut. Hi chung ah Delhi le Malaysia um Chin ralzaam minung 100 hmanh kan i tel lai zumh a um lo. Atu Biden teinak a hun hmuh i 2020-2021 ca ah ralzaam minung 125, 000 ka laak lai a ti. Obama lio ahkhan kum khat ah ralzaam minung 90,000 a lak. Kum khat ah Chinmi minung 6000 leeng US kan phan. Biden ahhin ralzaam laak ding milu a karh chinchin ca ah 2020-2021 ahhin cun Malaysia le Delhi Chin ralzaam 5000 cu US kan phan lai ti ruahchannak kan ngei ko,” tiah The Hakha Post ah a chim.
Minung tampi nih theih mi ram thumnak ah umhmun khuar khawhnak le umhmun khuar ding in nawl a hal mi poh minung a thong leeng in US nih nawl a pek hna hi kum caan saupi a si cang. Asinain President Trump a tuan chung ah ralzaam cohlan mi minung 85000 in 30000 a zor nain Biden tu nih cun tam deuh laak ding aa tim than.
Cun, Australia um Salai Ram Tinthei nih, “Atu Chin Refugees a latu hi Australia le US lawng an si cang. Australia hi cu tlawm tete lawng a laak. US cu a laak ahcun tam pipi in a laak hna i Chin Refugee hna ca ah hlawknak tampi a um. Laimi cheukhat nih Biden hi lakfa pawl thah riangmang i, refugee laak hi cu a si kho lo an ti tawn. Joe nih a dirpi mi cu naupawi hrawknak abortion cu nu hna i an covo a si ve ti hi a si. Abortion cu khamh khawh a si ve lo ca ah khawika ram poh ah a thli in an hrawh ko. Ngakchia chuahka hna an nun buin hlonh an si. US hi medical coast a tam ca ah sii-inn ah nau ngeihnak tangka an ngeih lo zong a si kho. Cucaah sii-inn ah tha tein nau hrawhnak kha nu an covo a si ve ko ti khi an cohlan,” tiah The Hakha Post ah a chim.
Malaysia ram ahhin Chinmi UN Card aa tlaih mi minung 22000 leeng le card a ngei lomi minung 23000 leeng an um tiah theih a si.
Cun, Malaysia um Tial Lian Thang nih, “Biden nih a tlawmbik kum fatin refugee 125,000 peng ka lak hna lai a timi hi a tuah taktak ahcun (tak lai/lo chim khawh si lo i mu, politician pawl bia cu 1. 2022 silole 2023 hnu cun Malaysia le India um Chinmi tam deuh ngai US kan phan lai ti ka zumh. Obama lio tluk tam cu kaa ruahchan lo nain Trump lio nak cun a tlawmbik let 2 tam deuh kan phan lai ti ka zumh,” tiah The Hakha Post ah a chim.
